1981. urtean ekin genion Araba Euskarazi, eta urterik urte, ekin eta ekin, iritsi gara 44. Araba Euskarazera. Ikastolok behar dugulako Araba Euskarazen bultzada, gure proiektuak aurrera ateratzeko. Euskarak behar duelako Araba Euskarazen bozgorailua, ozen entzun dadin. Euskal Kulturak behar duelako Araba Euskarazen agertokia, ikusia eta entzuna izan dadin. Arabarrok behar dugulako Araba Euskarazen topagunea, euskaraz bizi gaitezen.
Logotipoa
Infinituaren ideian inspiratuta dago eta Arabako lurraldeko zortzi ikastolen arteko lankidetza nabarmena sinbolizatzen du. Diseinu honen funtsezko elementuak hauek dira: forma nagusia, ekilore-petaloak, kolore horia eta mezua.
Forma nagusia
Logotipoak betikotasuna eta etengabeko mugimendua adierazten duen forma espirala aurkezten du, etengabeko bidaiaren eta denboraren jarioaren ideia gogora ekarriz.
Ekilore-petaloak
Espirala harmoniatsu konbinatzen da espirala inguratzen duten zortzi petaloekin. Petalo horietako bakoitzak Arabako zortzi ikastoletako bat adierazten du. Petaloak hazkundearen, aniztasunaren eta lankidetzaren sinbolo dira, elkarrekin osotasun harmoniatsua eta bateratua osatzen baitute.
Kolore horia
Logotipoan nagusi den kolorea horia da, eguzki-lorearen ezaugarria dena. Kolore honek argia, energia eta bizitasuna sinbolizatzen ditu. Gainera, ekilorea Arabako paisaiaren landare enblematiko bat da, eta komunitatearekin eta lurraldearekin lotura berezia ezartzen du.
Mezua
Logotipoak hezkuntzaren testuinguruan lankidetza eta hazkunde infinituaren mezua transmititzen du. Espiralak etengabeko hezkuntza-bidaia eta ezagutzaren etengabeko bilaketa iradokitzen du, ekilore petaloek, berriz, zortzi ikastolen elkartzea islatzen dute ahalegin bateratuan. Kolore horiak baikortasun eta argi sentipena gehitzen dio mezu honi.
Laburbilduz, logotipoa Arabako zortzi ikastolen arteko elkarlanaren irudikapen bisual indartsua da, hazkuntzaren ideia, etengabeko mugimendua eta Arabako paisaiaren edertasuna gogora ekarriz ekilorearen sinboloaren bitartez.
Mugaezin
Mugaezin; horrela, mugagabean, dugu 2024ko Araba Euskarazen leloa. Mugarik gabe eta mugaezin irudikatzen dugulako gure hizkuntza. Mugarik gabe, ez bada ortzi-muga, mugarriz mugarri, euskararentzako espazio zabalagok irekiz. Mugarik gabe, euskaraz hezi eta hazi nahi duten guztientzat.
Hegomendebaldeko bazterretik ari gara, bazter-herritik, euskarazko hatsa igorriz erdigunera. Baina erdigunean ere bagaude, eta indar zentripetua eragiten dugu, nafarrak eta errioxarrak, baita etorri berriak ere erakarriz gurera.
Gure gogoa, borondatea eta grina ere mugaezinak dira. Duela berrogeita hamar urte, guraso, irakasle eta ikasle aitzindariek abiatutako ikastola mugimendua guztiz errotuta dago Arabar Errioxan. Urteotan guztiotan lortu dugu eskualde honetan euskaldun eta ia euskaldunak %4 izatetik, %40tik gora izatea. Eta gure gogo, borondate eta grina mugaezinarekin lortuko dugu Arabar Errioxa euskalduna, Euskal Herri euskaldunean.
Su planetak eta Gar izarrak erakusten digute bidea, Lurretik 26 argi-urtera. Euskara unibertsala baita!